Ahadith

حضرت ابو ہریرہؓ کہتے ہیں کہ ہر نماز میں قراءت کی جاتی تھی۔ پس جس نماز میں ہمیں رسول اللہﷺ نے قراءت سنائی ہم نے(بھی) اس میں تمہیں (قراء ت) سنائی اور جس میں آپؐ نے آہستہ آواز میں قراءت کی اس میں ہم نے بھی آہستہ قراءت کی۔ اس پر انہیں کسی نے کہا کہ اگر میں ام القرآن(فاتحہ)سے زیادہ کچھ نہ پڑھوں؟ اس پر انہوں نے کہا کہ اگر تم اس سے زیادہ پڑھو تو وہ بہتر ہے لیکن اگراسی پر اکتفاء کرو تو وہ تمہاری طرف سے کافی ہو جائے گی۔

حضرت ابو ہریرہؓ سے روایت ہے کہ ایک دفعہ رسول اللہﷺ مسجد میں داخل ہوئے اور ایک آدمی بھی داخل ہوا، اس نے نماز اداکی۔ پھر آیا اور رسول اللہﷺ کی خدمت میں سلام عرض کیا۔ رسول اللہﷺ نے اسے سلام کا جواب دیا۔ پھر آپؐ نے فرمایا واپس جاؤ اور نماز پڑھو کیونکہ تم نے نماز نہیں پڑھی۔ وہ شخص واپس گیا اور نماز پڑھی جس طرح پہلے پڑھی تھی۔ پھر نبیﷺ کی خدمت میں حاضر ہوا اور سلام عرض کیا۔ آپؐ نے فرمایا وَعَلَیْکَ السَّلََامُ۔ پھر آپؐ نے فرمایا واپس جاؤ اور نماز پڑھو کیونکہ تم نے نماز نہیں پڑھی۔ یہانتک کہ تین دفعہ ایسا ہی ہوا۔ تب وہ آدمی کہنے لگا اس ذات کی قسم جس نے آپؐ کو حق کے ساتھ مبعوث کیا ہے میں اس سے بہتر نہیں کرسکتا۔ آپؐ مجھے سکھا دیجئے۔ آپؐ نے فرمایاکہ جب تم نماز کے لئے کھڑے ہو تو تکبیر کہو پھر جو تمہیں قرآن میں سے میسر ہو تلاوت کرو، پھر خوب اطمینان سے رکوع کرو۔ پھر سیدھے کھڑے ہوجاؤ۔ پھر سجدہ میں جاؤ تو خوب اطمینان سے سجدہ کرو پھر اٹھ کر اطمینان سے بیٹھو۔ پھر اس طرح اپنی ساری نماز میں کرو۔ ایک دوسری روایت میں ہے جو حضرت ابو ہریرہؓ سے مروی ہے کہ ایک شخص مسجد میں داخل ہوااور نماز پڑھی جب کہ رسول اللہﷺ ایک طرف تشریف فرما تھے اور یہ روایت دونوں راویوں سے اس کے مطابق بیان کی اور اس میں یہ مزید بیان کیاکہ جب تم نماز کے لئے کھڑے ہو تو پوری طرح وضوء کرو پھر قبلہ رو کھڑے ہو پھر تکبیر کہو۔

حضرت عمرانؓ بن حصین کہتے ہیں کہ رسول اللہﷺ نے ہمیں ظہر یا عصر کی نماز پڑھائی پھر فرمایا کہ تم میں سے میرے پیچھے کس نے سَبِّحِ اسْمَ رَبِّکَ الْاَعْلٰیپڑھی؟ اس پرایک آدمی نے کہا کہ میں نے ! اور میرا ارادہ اس سے محض نیکی کا تھا۔ اس پر آپؐ نے فرمایا کہ مجھے محسوس ہوا کہ تم میں سے کوئی (میرے پڑھنے میں ) مخلّ ہو رہا ہے۔

حضرت عمرانؓ بن حصین سے روایت ہے کہ رسول اللہﷺ نے نماز ظہر ادا کی۔ آپؐ کے پیچھے کوئی آدمی سَبِّحِ اسْمَ رَبِّکَ الْاَعْلٰی پڑھنے لگا۔ جب آپؐ نماز سے فارغ ہوئے تو آپؐ نے فرمایا کہ تم میں سے یہ(سَبِّحِ اسْمَ رَبِّکَ الْاَعْلٰی)کس نے پڑھا یاکون قراءت کر رہا تھا۔ اس پر اس آدمی نے عرض کیا کہ میں۔ اس پر آپؐ نے فرمایا کہ مجھے لگا کہ جیسے تم میں سے کوئی اس سے میری (قراء ت) میں مخلّ ہو رہا ہے۔ قتادہ سے اسی سند سے روایت ہے کہ رسول اللہﷺ نے ظہر کی نماز پڑھائی اور فرمایا کہ مجھے معلوم ہوتا تھا کہ تم میں سے کوئی اس سے میری (قراء ت) میں مخلّ ہو رہا ہے۔

حضرت انسؓ سے روایت ہے انہوں نے کہا کہ میں نے رسول اللہﷺ حضرت ابوبکرؓ، حضرت عمرؓ اور حضرت عثمانؓ کے ساتھ نماز پڑھی لیکن ان میں سے کسی کو میں نے بسم اللہ الرحمان الرحیم (جہرًا) پڑھتے نہ سنا۔

عبدَہ سے روایت ہے کہ حضرت عمرؓ بن خطاب یہ کلمات جہرًا پڑھتے تھے سُبْحَانَکَ اللّٰہُمَّ وَبِحَمْدِکَ وَتَبَارَکَ اسْمُکَ وَتَعَالٰی جَدُّکَ وَلَا اِلٰہَ غُیْرُکَ: یعنی اے اللہ تو پاک ہے۔ اپنی تعریف کے ساتھ، بہت برکت والا ہے تیرا نام اور بہت بلند ہے تیری شان اور تیرے سوا کوئی عبادت کے لائق نہیں۔ حضرت انس بن مالکؓ بیان کرتے ہیں کہ میں نے نبیﷺ کے پیچھے اور حضرت ابو بکرؓ، حضرت عمرؓ اور حضرت عثمانؓ کے پیچھے نماز پڑھی تو وہ (سب) اَلْحَمْدُ لِلّٰہِ رَبِّ الْعٰلَمِیْنَ سے نماز کی ابتداء کیا کرتے تھے اور سورہ فاتحہ سے پہلے یا بعد بسم اللہ (جہرًا) نہیں پڑھتے تھے۔

حضرت انسؓ کہتے ہیں کہ ایک روز رسول اللہﷺ ہمارے درمیان تشریف فرما تھے۔ اس دوران میں آپؐ پر ہلکی سی ربودگی طاری ہوئی۔ پھر آپؐ نے تبسّم فرماتے ہوئے اپنا سر اٹھایا۔ ہم نے عرض کیا کہ یا رسول اللہ ! آپؐ کس بات پر مسکرائے؟آپؐ نے فرمایا کہ ابھی ابھی مجھ پر ایک سورۃ نازل ہوئی ہے پھر آپؐ نے قراءت فرمائی۔ {بِسْمِ اللّٰہِ الرَّحْمٰنِ الرَّحِیْمِ O اِنَّا اَعْطَیْنَاکَ الْکَوْثَرَ O فَصَلِّ لِرَبِّکَ وَانْحَرْ Oانَّ شَانِئَکَ ھُوَ الْاَبْتَرْ} ترجمہ: اللہ کے نام کے ساتھ جو بے انتہاء رحم کرنے والا اور بار بار رحم کرنے والاہے۔ یقینا ہم نے تجھے کوثر عطاء کی ہے۔ پس اپنے رب کے لئے نماز پڑھ اور قربانی دے۔ یقینا تیرا دشمن ہی ابتر رہے گا۔ پھر آپؐ نے فرمایا کہ کیا تمہیں پتہ ہے کہ ’’الکوثر‘‘ کیا ہے؟ ہم نے عرض کیا کہ اللہ اور اس کا رسولؐ بہتر جانتے ہیں۔ آپؐ نے فرمایا کہ یہ ایک عظیم الشان دریا ہے جس کا وعدہ میرے رب عزوجل نے مجھ سے فرمایا ہے جس پرخیر کثیر ہے وہ ایک حوض ہے۔ جس پر میری امت قیامت کے دن اترے گی۔ اس کے برتن ستاروں کی تعداد کے برابر ہیں۔ اُن میں سے ایک آدمی کھینچ لیا جائے گا۔ تب میں کہوں گا کہ اے میرے رب! یہ میری امت میں سے ہے۔ تب وہ فرمائے گا کہ تم نہیں جانتے کہ آپ کے بعد اس نے کیا کیا؟ ابن حجر نے اپنی روایت میں ’’بَیْنَااَظْہُرِنَا‘‘ کے بعد’’فِی الْمَسْجِدِ‘‘ کے الفاظ زائد کئے ہیں۔ نیز انہوں نے کہا ہے۔ مَا اَحْدَثَ بَعْدَکَ(اس شخص نے آپؐ کے بعد کیا کیا) مختار بن فلفل کہتے ہیں کہ میں نے حضرت انسؓ بن مالک کو کہتے ہوئے سنا کہ رسول اللہﷺ پر ہلکی سی ربودگی طاری ہوئی۔ ابن مسھر کی روایت کے مطابق سوائے اس کے کہ انہوں نے کہا وہ ایک نہر ہے جس کا جنت میں میرے رب عزوجل نے مجھ سے وعدہ فرمایا ہے۔ اس پر حوض ہوگا اور آنِیَتُہُ عَدَدَ النُّجُوْمِ کے الفاظ ذکر نہیں کئے۔