Ahadith

حضرت ابو ہریرہؓ کہتے ہیں کہ میں نے رسول اللہﷺ کو فرماتے ہوئے سنا اللہ عزوجل فرماتا ہے ابن آدم زمانے کو گالی دیتا ہے اور زمانہ تو میں ہوں۔ رات اور دن میرے ہاتھ میں ہیں۔

حضرت ابو ہریرہؓ سے روایت ہے کہ رسول اللہﷺ نے فرمایا اللہ عزوجل فرماتا ہے ابن آدم مجھے ایذاء دیتا ہے وہ زمانہ کو گالی دیتا ہے اور زمانہ میں ہوں۔ رات اور دن کو میں ادلتا بدلتا ہوں۔

حضرت ابو ہریرہؓ سے روایت ہے وہ کہتے ہیں رسول اللہ ﷺ نے فرمایا اللہ عزوجل فرماتا ہے ابن آدم مجھے تکلیف دیتا ہے وہ کہتا ہے وائے زمانہ کی بد بختی۔ لہٰذا تم میں سے کوئی ہرگز یہ نہ کہے وائے زمانہ کی بد بختی کیونکہ زمانہ میں ہی ہوں۔ اس کے رات اور دن کو میں ادلتا بدلتا ہوں اور میں جب چاہوں گا ان دونوں کو روک لوں گا۔

حضرت ابو ہریرہؓ سے روایت ہے کہ رسول اللہﷺ نے فرمایا تم میں سے کوئی وائے زمانہ کی بد بختی نہ کہے کیونکہ اللہ ہی زمانہ ہے۔

حضرت ابو ہریرہؓ سے روایت ہے کہ نبی ﷺ نے فرمایا زمانہ کو گالی نہ دو کیونکہ اللہ ہی زمانہ ہے۔

حضرت ابو ہریرہؓ سے کہتے ہیں کہ رسول اللہﷺ نے فرمایا تم میں سے کوئی زمانہ کو بُرا نہ کہے کیونکہ اللہ ہی زمانہ ہے اور نہ ہی کوئی انگور کو کَرْم کہے کیونکہ ’’کَرْم‘‘ مسلمان آدمی ہے۔

حضرت ابو ہریرہؓ سے روایت ہے کہ نبیﷺ نے فرمایا انگور کو کَرْم نہ کہو کیونکہ کَرْم تو مؤمن کا دل ہے۔

حضرت ابو ہریرہؓ سے روایت ہے کہ نبی ﷺ نے فرمایا انگور کو کَرْم نہ کہو کیونکہ کَرْم تو مردِ مسلم ہے۔

حضرت ابو ہریرہؓ کہتے ہیں رسول اللہﷺ نے فرمایا تم میں سے کوئی (انگور کو) کَرْم نہ کہے کیونکہ کَرْم تو مؤمن کا دل ہے۔

ہمام بن منبّہ کہتے ہیں یہ وہ احادیث ہیں جو حضرت ابو ہریرہؓ نے رسول اللہﷺ سے بتائیں اور انہوں نے کئی احادیث بیان کیں جن میں سے ایک یہ ہے کہ رسول اللہﷺ نے فرمایا تم میں سے کوئی انگور کو کَرْم نہ کہے۔ کَرْم تو مسلمان شخص ہے۔