Ahadith

حضرت ابو ہریرہؓ کہتے ہیں کہ میں نے رسول اللہﷺ کو فرماتے ہوئے سنا کہ لوگ مدینہ کو اس کی بہترین حالت کے باوجود چھوڑ دیں گے سوائے عوافی کے وہاں کوئی نہ جائے گا۔ عوافی سے آپؐ کی مراد درندے اور پرندے تھی۔ پھر مزینہ قبیلہ سے دو چرواہے مدینہ کا قصد کرتے ہوئے نکلیں گے وہ اپنی بکریوں کو آواز دیں گے وہ دونوں اس کو ویران پائیں گے یہاں تک کہ جب وہ دونوں ثنیہ الوداع پہنچیں گے تو دونوں اپنے منہ کے بل گر جائیں گے۔

حضرت عبد اللہ بن زیدؓ المازنی سے روایت ہے کہ رسول اللہ ﷺ نے فرمایا میرے گھر اور میرے منبر کے درمیا ن (کا علاقہ) جنت کے باغوں میں سے ایک باغ ہے۔

حضرت عبداللہ بن زیدؓ انصاری سے روایت ہے کہ انہوں نے رسول اللہ ﷺ کو فرماتے ہوئے سنا کہ میرے منبر اور میرے گھر کے درمیان (کا علاقہ) جنت کے باغوں میں سے ایک باغ ہے۔

حضرت ابو ہریرہؓ سے روایت ہے کہ رسول اللہﷺ نے فرمایا میرے گھر اور میرے منبر کے درمیا ن (کا علاقہ) جنت کے باغوں میں سے ایک باغ ہے اور میرا منبر میرے حوض پر ہے۔

حضرت ابو حُمَیدؓ سے روایت ہے کہ ہم غزوہ تبوک میں رسول اللہ ﷺ کے ساتھ نکلے اور انہوں نے پوری روایت بیان کی اور اس میں یہ بھی تھا پھر ہم (واپس) ہوئے یہاں تک کہ وادی القری پہنچے تو رسول اللہ ﷺ نے فرمایا میں جلد جا رہا ہوں۔ پس جو شخص تم میں سے چاہے میرے ساتھ جلدی آجائے اور جو چاہے ٹھہر جائے پھر ہم روانہ ہوئے یہاں تک کہ مدینہ پر ہماری نظر پڑی آپؐ نے فرمایا یہ طابہ ہے اور یہ احد ہے اور یہ وہ پہاڑ ہے جو ہم سے محبت کرتا ہے اور ہم اس سے محبت کرتے ہیں۔

حضرت انس بن مالکؓ کہتے ہیں کہ رسول اللہﷺ نے فرمایا احد ایک پہاڑ ہے جو ہم سے محبت کرتا ہے اور ہم اس سے محبت کرتے ہیں۔

حضرت انسؓ کہتے ہیں کہ رسول اللہﷺ نے احد کی طرف دیکھا اور فرمایا یقینا احد وہ پہاڑ ہے ہم سے محبت کرتا ہے اور ہم اس سے محبت کرتے ہیں۔

حضرت ابوہریرہؓ سے روایت ہے وہ اسے نبیﷺ تک پہنچاتے ہیں کہ آپؐ نے فرمایا میری اس مسجد میں نماز کسی بھی دوسری مسجد میں سوائے مسجد حرام کے ایک ہزار نماز سے افضل ہے۔

حضرت ابو ہریرہؓ سے روایت ہے کہ رسول اللہﷺ نے فرمایا میری اس مسجد میں نماز کسی بھی دوسری مسجد میں سوائے مسجد حرام کے ایک ہزار نماز سے بہتر ہے۔

ابو سلمۃ بن عبد الرحمان اور جہینہ والوں کے آزاد کردہ غلام ابو عبد اللہ الاغر جو حضرت ابوہریرہؓ کے ساتھیوں میں سے تھے ان دونوں نے حضرت ابوہریرہؓ کو کہتے ہوئے سنا کہ رسول اللہﷺ کی مسجد میں نماز دوسری کسی مسجد سے سوائے مسجد حرام کے ہزار نماز سے افضل ہے کیونکہ رسول اللہﷺ آخری نبی ہیں اور آپؐ کی مسجد آخری مسجد ہے۔ ابو سلمۃ اور ابو عبد اللہ کہتے ہیں کہ ہمیں اس میں کوئی شک نہیں تھا کہ حضرت ابو ہریرہؓ یہ بات رسول اللہﷺ سے بیان کیا کرتے تھے اس وجہ سے ہم رکے رہے کہ ہم حضرت ابوہریرہؓ سے اس حدیث کے متعلق توثیق چاہیں یہاں تک کہ جب حضرت ابوہریرہؓ کی وفات ہوگئی تو ہم نے ایک دوسرے سے اس کا ذکر کیا اور ایک دوسرے کو ملامت کی کہ کیوں نہ ہم نے اس بارہ میں حضرت ابوہریرہؓ سے بات کرلی کہ اگر انہوں نے اسے آپؐ سے سنا تھا تو وہ اسے رسول اللہﷺ کی طرف منسوب کریں اسی دوران عبد اللہ بن ابراہیم بن قارظ سے ہماری مجلس ہوئی۔ تو ہم نے اس روایت کا ذکر کیا اور حضرت ابوہریرہؓ کی اس روایت کے مرفوع ہونے کے بارہ میں جو کوتاہی ہم سے ہوئی تھی اس کا بھی ذکر کیا۔ ہمیں عبد اللہ بن ابراہیم نے کہا میں گواہی دیتا ہوں کہ میں نے حضرت ابو ہریرہؓ سے سنا وہ کہتے تھے کہ رسول اللہﷺ نے فرمایا میں آخری نبی ہوں اور میری مسجد آخری مسجد ہے۔