Ahadith

حضرت عبداللہ بن عمر رضی اللہ عنہما سے روایت ہے کہ نبی ﷺ نے فرمایا مہینہ اس طرح اور اس طرح اور اس طرح (بھی) ہوتا ہے دس اور دس اور نو (یعنی اُنتیس دن کا)۔

عقبہ بن حُریث سے روایت ہے وہ کہتے ہیں میں نے حضرت ابن عمر رضی اللہ عنہما کو کہتے ہوئے سنا کہ رسول اللہ ﷺ نے فرمایا مہینہ انتیس (دن) کا بھی ہوتا ہے۔ شعبہ (راوی) نے اپنے دونوں ہاتھ تین دفعہ ملائے اور تیسری مرتبہ اپنے انگوٹھے کو کم کیا۔ عقبہ (راوی) کہتے ہیں میرا خیال ہے (حضرت ابن عمرؓ) نے کہا مہینہ تیس کا ہوتا ہے اور اپنی دو ہتھیلیاں تین مرتبہ ملائیں۔

حضرت ابن عمر رضی اللہ عنہم بیان کرتے ہیں کہ نبی ﷺ نے فرمایا ہم اُمّی لوگ ہیں ہم نہ لکھتے ہیں اور نہ حساب کتاب رکھتے ہیں۔ مہینہ تو اس طرح، اس طرح اور اس طرح ہوتا ہے اور تیسری دفعہ آپؐ نے اپنے انگوٹھے کو بند کیا اور مہینہ اس طرح، اس طرح اور اس طرح بھی ہوتا ہے۔ یعنی پورے تیس دن۔ ایک اور روایت میں دوسرے مہینے کے لئے تیس کا ذکر نہیں۔

سعد بن عبیدہ سے روایت ہے وہ کہتے ہیں حضرت ابن عمر رضی اللہ عنہما نے ایک شخص کو کہتے سنا کہ آج کی رات (مہینہ کی) درمیانی رات ہے۔ آپؓ نے اسے کہا تجھے کیسے معلوم ہوا کہ آج کی رات درمیانی ہے؟ میں نے رسول اللہ ﷺ کو فرماتے سنا ہے کہ مہینہ اس طرح اور اس طرح ہوتا ہے۔ آپؐ نے اپنی دس انگلیوں سے دو مرتبہ اشارہ کیا اور تیسری مرتبہ اپنی انگلیوں کے اشارہ سے فرمایا مگر اپنے انگوٹھے کو روک لیا یا موڑ لیا۔

حضرت ابو ہریرہ رضی اللہ عنہ سے روایت ہے وہ کہتے ہیں رسول اللہ ﷺ نے فرمایا جب تم نیا چاند دیکھو تو روزے رکھو اور جب تم اسے دیکھو تو روزے رکھنے چھوڑ دو۔ اگر بادل وغیرہ کی وجہ سے تمہیں نظر نہ آئے تو تیس دن روزے کرو۔

حضرت ابو ہریرہ رضی اللہ عنہ سے روایت ہے کہ نبی ﷺ نے فرمایا تم اس (چاند) کو دیکھ کر روزے رکھو اور اس کو دیکھ کر روزے چھوڑ دو۔ اگر تم پر وہ (چاند) اوجھل رہے تو گنتی پوری کرو۔

حضرت ابو ہریرہ رضی اللہ عنہ کہتے ہیں رسول اللہ ﷺ نے فرمایا تم (نیا چاند) دیکھ کر روزے رکھو اور اس کو دیکھ کر روزے رکھنے چھوڑ دو۔ اگر بادل کی وجہ سے مہینہ تم پر مبہم ہو جائے تو تیس شمار کر لو۔

حضرت ابو ہریرہ رضی اللہ عنہ کہتے ہیں کہ رسول اللہ ﷺ نے ہلال کا ذکر کیا اور فرمایا جب تم اسے دیکھو تو روزے رکھو اور جب تم اسے دیکھو تو روزے رکھنے چھوڑ دو۔ اور اگر تمہیں بادل وغیرہ کی وجہ سے نظر نہ آئے تو تیس شمار کر لو۔

حضرت ابو ہریرہ رضی اللہ عنہ سے روایت ہے کہ رسول اللہ ﷺ نے فرمایا کہ رمضان سے ایک دو دن پہلے روزے نہ رکھو۔ سوائے اس شخص کے جو پہلے سے یہ روزے رکھ رہا ہو وہ یہ روزے رکھ سکتا ہے۔