Ahadith

عبدالعزیز بن عبداللہ نے مجھ سے بیان کیا۔ اُنہوں نے کہا: ابراہیم بن سعد نے مجھے بتایا۔ اُنہوں نے ابن شہاب سے، ابن شہاب نے ابوسلمہ بن عبدالرحمٰن اور عبد الرحمٰن اعرج سے روایت کی کہ اُن دونوں نے ان کو بتایا کہ حضرت ابوہریرہؓ کہتے تھے: دو آدمیوں نے ایک دوسرے کو گالیاں دیں۔ ایک شخص مسلمانوں میں سے تھا اور ایک شخص یہودیوں میں سے۔ مسلمان نے کہا: اُس ذات کی قسم ہے جس نے محمدؐ کو تمام قوموں پر چن لیا۔ تو یہودی نے کہا: اُس ذات کی قسم ہے جس نے موسیٰؑ کو تمام قوموں پر چن لیا۔ حضرت ابوہریرہؓ کہتے تھے۔ (یہ سنتے ہی) مسلمان کو غصہ آ گیا اور اُس نے یہودی کے منہ پر تھپڑ مارا۔ تو وہ یہودی رسول اللہ صلی اللہ علیہ وسلم کے پاس گیا اور جو اپنی اور مسلمان کی سرگزشت تھی، وہ آپؐ کو بتائی۔ رسول اللہ صلی اللہ علیہ وسلم نے فرمایا: مجھے موسیٰؑ سے بہتر قرار نہ دو یقینًا لوگ قیامت کے روز بے ہوش ہوجائیں گے اور میں وہ پہلا شخص ہوں گا جو ہوش میں آئے گا۔ تو میں کیا دیکھوں گا کہ موسیٰؑ عرش کے کنارے کو تھامے ہوئے ہیں۔میں نہیں جانتا کہ موسیٰؑ بھی اُن لوگوں میں سے تھے جو بے ہوش تھے اورمجھ سے پہلے ہوش میں آئے یا اُن لوگوں میں سے تھے جن کو اللہ نے مستثنیٰ کیا۔

ابوالیمان نے ہم سے بیان کیا کہ شعیب نے ہمیں بتایا۔ ابو زناد نے ہم سےبیان کیا، اُنہوں نے اعرج سے، اعرج نے حضرت ابوہریرہؓ سے روایت کی کہ نبی صلی اللہ علیہ وسلم نے فرمایا: لوگ بے ہوش ہوں گے، جب وہ بے ہوش ہوں گے تو میں پہلا ہوں گا جو کھڑا ہوں گا۔ تو کیا دیکھوں گا کہ کہ موسیٰؑ عرش کو تھامے ہوئے ہیں۔ میں نہیں جانتا کہ آیا وہ اُن لوگوں میں تھے جو بے ہوش ہوئے؟حضرت ابوسعیدؓ نے بھی نبی صلی اللہ علیہ وسلم سے اس حدیث کو روایت کیا۔

محمد بن مقاتل نے ہم سے بیان کیا کہ عبداللہ (بن مبارک) نے ہمیں بتایا ۔ یونس (بن یزید) نے ہمیں خبر دی۔یونس نے زہری سے، زہری نےابو سلمہ سے روایت کی کہ سعید بن مسیب نے مجھ سے بیان کیا، سعید نے حضرت ابوہریرہ رضی اللہ عنہ سے، حضرت ابوہریرہؓ نے نبی صلی اللہ علیہ وسلم سے روایت کی۔ آپؐ نے فرمایا: اللہ اپنی قدرت سے زمین کو سمیٹ لے گا اور آسمان کو لپیٹ لے گا۔ پھر فرمائے گا: میں بادشاہ ہوں اب زمین کے بادشاہ کہاں ہے۔

یحيٰ بن بکیر نے ہم سے بیان کیا کہ لیث نے ہمیں بتایا۔ اُنہوں نے خالد (بن یزید) سے، خالد نے سعید بن ابی ہلال سے، سعید نے زید بن اسلم سے، زید نے عطاء بن یسار سے، عطاء نے حضرت ابوسعید خدریؓ سے روایت کی کہ نبی صلی اللہ علیہ وسلم نے فرمایا: قیامت کے روز زمین ایک روٹی (کی طرح ہموار یکساں) ہو جائے گی۔ وہ جبّار ذات اپنے ہاتھ سے اس کو اُلٹ پلٹ کربرابر کر دے گی۔ اُسی طرح جس طرح تم میں سے کوئی سفر میں اپنی روٹی کو اُلٹ پلٹ کر ہموار بنا دیتا ہے۔ تاکہ جنتیوں کے لئے (ایسی) قیام گاہ ہو (جس میں اُن کی تمام کھانے پینے کی ضروریات بافراغت ہوں۔) اتنے میں ایک یہودی شخص آیا، کہنے لگا: ابوالقاسم ! رحمٰن آپؐ کو برکت دے کیا میں آپؐ کو نہ بتاؤں کہ قیامت کے روز جنتیوں کے لئے کیا کچھ مہمانی کا سامان ہوگا؟ آپؐ نے فرمایا: کیوں نہیں ضرور بتاؤ۔ اس نے کہا: زمین روٹی کی طرح ہموار یکساں ہوگی۔ اُسی طرح بتایا جس طرح نبی صلی اللہ علیہ وسلم نے فرمایا تھا۔ نبی صلی اللہ علیہ وسلم نے ہماری طرف دیکھا اور پھر اتنا ہنسے کہ آپؐ کی داڑھیں دکھائی دیں۔ پھر اس یہودی نے کہا: کیا میں آپؐ کو نہ بتاؤں کہ انکا سالن کیا ہوگا؟ کہنے لگا: انکا سالن بالام اور نون ہوگا۔ صحابہ نے کہا: یہ کیا چیزیں ہیں؟ اس نے کہا: بیل اور مچھلی۔ ان دونوں کے کلیجے کے بڑھے ہوئے ٹکڑے سے ستر ہزار آدمی کھائیں گے۔