Ahadith

حضرت ابو امامہؓ سے روایت ہے کہ رسول اللہ ﷺنے فرمایا تم میں سے کوئی بیت الخلاء میں داخل ہونے کے وقت یہ کہنے سے رہ نہ جائے کہ اے اللہ ! میں گندے ، نجس ، خبیث، گندہ کرنے والے شیطان جو دھتکارا ہواہے، سے تیری پناہ مانگتا ہوں۔ایک روایت میں مِنَ الْرِّجْسِ النَّجِسِ کے الفاظ نہیں ہیں ۔

یوسف بن ابی بردہ نے بیان کیا کہ میں نے اپنے باپ کو کہتے ہوئے سنا کہ میں حضرت عائشہؓ کے پاس گیا اور اُن کو یہ کہتے ہوئے سُنا کہ رسول اللہ ﷺ بیت الخلاء سے نکلتے تو یہ دعا پڑھتے غُفْرَانَکَ تیری مغفرت چاہتا ہوں ۔

حضرت عبد اللہ بن مغفل ؓ نے بیان کیا کہ رسول اللہ ﷺ نے فرمایا تم میں سے کوئی ہرگز اپنے نہانے کی جگہ پر پیشاب نہ کرے کیونکہ عموماً وسوسے اُسی سے ہوتے ہیں۔ ابو عبد اللہ بن ماجہ نے کہا کہ میں نے محمد بن یزید کو کہتے ہوئے سنا اور انہوں نے علی بن محمد بن طنافسی کو کہتے ہوئے سنا کہ یہ صرف گڑھے کی بات ہے ، آج تو نہیں ۔( آج کل) لوگوں کے غسل خانے چاک چونہ ، صاروج ٭ تارکول کے ہیں۔ اگر کوئی پیشاب کرے اور پانی بہادے تو اس میں کوئی حرج نہیں ۔

حضرت مغیرہؓ سے روایت ہے کہ رسول اللہ ﷺ ایک قوم کے کوڑا پھینکنے کی جگہ پر آئے اور کھڑے ہوئے پیشاب کیا ۔