Ahadith

حضرت ابو ہریرہؓ نے بیان کیا کہ رسول اللہ ﷺ نے فرمایا آدمی کی باجماعت نماز ثواب میں اُس کی گھر میں اور بازار میں نماز سے بیس سے کچھ اوپر درجہ رکھتی ہے۔

حضرت ابوہریرہؓ سے روایت ہے کہ رسول اللہ ﷺ نے فرمایا نماز باجماعت کی فضیلت تم میں سے کسی کے اکیلے نماز پڑھنے سے پچیس حصّے زیادہ ہے۔

حضرت ابو سعید خدریؓ نے بیان کیا کہ رسول اللہﷺ نے فرمایا آدمی کی باجماعت نماز اُس کی اس نماز سے پچیس گنا زیادہ ہے جو اس کے اپنے گھر میں ہو۔

حضرت ابن عمرؓ نے بیان کیا کہ رسول اللہ ﷺ نے فرمایا آدمی کی باجماعت نماز اُس کی اکیلے کی نماز سے ستائیس درجے افضل ہے۔

حضرت أُبَی بن کَعبؓ نے بیان کیا کہ رسول اللہ ﷺ نے فرمایا آدمی کی باجماعت نماز اُس کی اکیلے کی نماز سے ستائیس درجے زیادہ ہے۔

حضرت ابوہریرہؓ نے بیان کیا کہ رسول اللہ ﷺ نے فرمایا میں نے سوچا کہ نماز کا حکم دوں اور نماز کے لئے اقامت کہی جائے پھر میں کسی آدمی کو کہوں کہ وہ لوگوں کو نماز پڑھائے اور میں کچھ لوگوں کو ساتھ لے کر جاؤں جن کے پاس ایندھن کے گٹھے ہوں، ایسے لوگوں کی طرف (جاؤں) جو نماز میں حاضر نہیں ہوتے اور اُن ہی پر اُن کے گھروں کو آگ سے جلا دوں۔

حضرت ابن اُم مکتومؓ نے بیان کیا کہ میں نے نبی ﷺ سے عرض کیا کہ میں بڑی عمر کا کمزور بینائی والا ہوں اور میرا گھر دور ہے اور میرے پاس کوئی ایسا رستہ بتانے والا بھی نہیں ہے جو میرے لئے مناسب ہو، کیا آپؐ (میرے لئے گھر میں نماز پڑھنے کی) رخصت پاتے ہیں؟ آپؐ نے فرمایا کیا تُم اذان سنتے ہو؟ میں نے کہا ہاں۔ فرمایا میں تمہارے لئے کوئی رخصت نہیں پاتا۔

حضرت ابن عباس ؓ بیان کرتے ہیں کہ نبی ﷺ نے فرمایا جس نے اذان سنی اور اس کی طرف نہیں آیا۔ اس کی نماز نہیں ہے سوائے کسی عذر کی وجہ سے۔

حکم بن میناء نے بیان کیا کہ حضرت ابن عباسؓ اور حضرت ابن عمرؓ نے مجھے بتایا انہوں نے نبی ﷺ کو فرماتے ہوئے سنا جبکہ آپؐ منبر پر تھے: لوگ نماز باجماعت ترک کرنے سے باز آجائیں ورنہ اللہ ان کے دلوں پر مہر لگا دے گا۔ پھر وہ یقینا غافلوں میں سے ہو جائیں گے۔